Pinasabog kan Israel an sarong target harani sa Tehran, sa ibong kan mahigot na patanid ni Presidente Donald Trump kan Estados Unidos na pugulan an mga airstrike makalihis na an duwang lado nagtugot suboot sa sarong ceasefire.
Dagit na kinastigo ni Trump an Iran asin Israel huli sa pagbalgar kan pinagkasunduan na tigil-putukan, alagad lalo niyang pigtuyaw an kaalyado kaini na Israel huli sa labing sakop kan saindang opensiba.
Segun saiya, pigsugo niya an Israel na punduhon na an airstrikes tanganing mamantenir an kasunduan.
Alagad, pirang oras pagkatapos na ianunsyar an ceasefire, duwang makusog na pagsabog an nadangog sa Tehran, segun sa mga nakahiling.
Kinumpirmar kan opisina ni Israeli Prime Minister Benjamin Netanyahu na binomba ninda an sarong radar site sa Tehran bilang simbag sa mga missile na soboot piglansar kan Iran tolong oras pagkatapos na dapat magpoon an tigil-putukan.
Mahigot man na pignigaran kan Iran na sinda an enot na nagbalgar, asin nagsabi na an pag-atake kan Israel nagpadagos nin labing sarong oras makalihis an nakatalaang ceasefire.
Sinabi ni Presidente kan Iran na si Masoud Pezeshkian na preparado sindang magbalik sa negosasyon kun dai na magbalgar giraray an Israel.
