Nag-walkout an delegasyon kan Iran hali sa venue kan negosasyon sa Switzerland, na obhetong tapuson an giyera sa Middle East, makalihis magpatanid si US President Donald Trump kontra sa Islamic Republic huli sa suporta kaini sa grupong Hezbollah sa Lebanon.
Segun sa report kan Iran state media (IRNA), nagluwas an delegasyon kan Iran sa Bürgenstock Resort makalihis an saindang pakikipag-olay sa delegasyon kan Qatar na nagseserbing saro sa mediator.
Kasabay kaini, nag-post man si Trump sa X (dating Twitter) ngani na utruhon an saiyang mga patanid asin pahayag kontra sa Iran.
Sa ibong kan insidente, tinawan duon kan sarong diplomat na may kaaraman sa pag-oolay na dae pa dagos na nagtatalikod an Iran sa mga negosasyon asin nagtetenir sindang “engaged.”
Enot nang nagpatanid si Trump na aatakihon an Iran kun dae tulos pupugulan an inapod kaining bayadan na “proxies” sa Lebanon na gumibo nin kariribukan.
Tulos man ining sinimbag kan Islamic Republic.
Segun ki Mohammad Bagher Ghalibaf, an chief negotiator kan Iran, makakarahay na maglikay an Estados Unidos sa mga pahayag kaini huli ta preparado an saindang militar na magsimbag asin magbalos sa anuman na paagi.
