Nagpatanid liwat an Iran na isasarado an Strait of Hormuz na sarong importanteng agihan para sa mga eksport nin langis, kun magpapadagos an blockade kan Estados Unidos sa mga pantalan kan Iran.
An patanid an ginibo ni Iranian Parliament Speaker Mohammad Bagher Ghalibaf, na nangenot sa delegasyon kan Iran sa dai pa sana nahahaloy na negosasyon sa Estados Unidos sa Islamabad, kasunod kan temporaryong pagbukas kan lagusan huli sa sarong ceasefire, kun sain pigdoon kan Tehran na an padagos na aksyon kan Estados Unidos an sarong pagbalgar sa kasunduan asin mabunga kan pagsara liwat kan ruta kan langis.
Sinabi kan Parliamentary Speaker na dai magtetenir na bukas an Strait of Hormuz kun magpapadagos an blockade kan Estados Unidos.
Pinalagan man ni Ghalibaf an pitong claims ni US President Donald Trump bilang “false,” kabali an claim na nanggana an Estados Unidos sa gera.
Pigtawan doon niya an nakaaging pahayag ni Iranian Foreign Ministry spokesman Esmail Baghaei, na nagsabi na nakadepende sa sitwasyon sa ground kun magtetenir na bukas o sarado an Strait of Hormuz asin bako sa mga sentimyento sa social media.
Ginibo man ninda Ghalibaf asin Baghei an pahayag makalihis na ihayag ni Foreign Minister Abbas Araghchi na magigin ganap na bukas an tunel sa gabos na mga commercial vessels sa natatada pang panahon kan ceasefire.
Mientrastanto, dati nang nagpahayag si Trump nin optimismo na madali na an sarong kasunduan sa katoninongan, makalihis na magtugot an Iran na itao an saindang enriched uranium.
