Ikinasar kan Iran an liwat na pagsarado kan Strait of Hormuz huli sa padagos na “blockade” o pagharang kan Estados Unidos sa saindang mga daungan.
Inapod kan Iran na “piracy” o pandarambong sa kadagatan an piggibo kan US.
Sarong aldaw sana makalihis inanunsyar kan Iran na bukas na an Hormuz Strait kasunod kan deklarasyon nin sampulong aldaw na tigil-putukan o ceasefire sa pagultangan kan Lebanon asin Israel, binawi ini kan Iranian military.
Ini-report kan mga maritime security sources na may mga putok nin badil na gikan sa mga gunboat kan Iran laban sa sarong tanker. Dakol na barko an nagbalik huli sa matinding tensyon.
Sa Hormuz Strait nag-aagi an haros 20% kan langis sa bilog na kinaban, kaya an pagsarado kaini an nagkakawsa nin takot sa paghalangkaw kan presyo nin langis.
Sinabi kan Iran na magtitinir an mahigot na kontrol sa nasabing kadagatan sagkod dae pigtanggal kan Amerikan an saindang naval blockade.
