LEGAZPI CITY-Ipighayag kan Revolutionary Guard Corps (IRGC) kan Iran na tatawan kaini nin kalayaan asin otoridad an mga nacion sa Arab asin Europa sa Strait of Hormuz kun papalayason an ambassador kan Israel asin Estados Unidos.
Kasunod ini kan pahayag ni U.S. President Donald Trump na an gera sa Gulf region madali nang matapos huli sa demonstrasyon sa pag-talaga sa bagong Supreme Leader kan Iran na si Mojtaba Khamenei.
Segun sa sainda, dai tutugutan an pag-export nin langis hale sa rehiyon kun magpapadagos an mga military action kan Estados Unidos asin Israel.
Sinabi man kaini na sinda an magdedesisyon sa pagtatapos kan gera sa West Asia asin bako an Amerika.
An nasabing strait of Hormuz, iyo an pigkokonsidera sa pinakadakulang ruta kan pag-export nin langis sa bilog na kinaban, na may koneksyon sa mga pangenot na Gulf oil producers pasiring sa Gulf of Oman asin Arabian Sea.
Mientrastanto, nagsakat na sa $120 an kada bariles kan krudo sa sampulong aldaw na labanan kana Estados Unidos asin Israel laban sa Iran.
Nag-resulta ini sa pagkahadit sa enerhiya sa pankinabang merkado asin uminabot na sa $119.50 kada bariles an presyo kan Brent crude.
Mantang nagbaba an presyo sa haros $100 kan Martes, labi sa 20% an linangkaw kaini kumparar kan pagpoon kan gera kan Pebrero 28.
Padifisilan man ini para sa mga Gulf oil producers huli sa mga naraot na site dara kan mga nakalihis na mga pag-atake.
