LEGAZPI CITY — Bako nagin matrayumpo an rebeldeng grupong New People’s Army (NPA) sa mga plano na pagsakyada sa mga kampo kan militar sa rehiyong Bicol.
Sa intrevista kan Bombo Radyo Legazpi ki 901st Infantry Brigade Commander Col. Alden Masagca, igwa na suboot sindang naresibeng impormasyon sa planong paglaog kan NPA sa detachment kan Citizen Armed Force Geographical Unit (CAFGU).
Alagad segun ki Masagca, maski anong gibuhon kan mga ini dae nanggad matrayumpo asin magiging “useless” sana kun saen patotoo digdi, pirang dekada na an kampanya kan kilusan alagad wara man na nangyayari.
Dugang pa ni Masagca na panahon na ngane na mag-isip-isip an mga rebelde na kun mawot na maging marhay an buhay sa rehiyon, ipursige an ipinaglalaban sa marhay asin matoninong na paagi asin bako sa armadong pakikibaka.
Ikinaogma man kan opisyal an nagiging partisipasyon kan namamanwa sa paagi kan pagri-report nin engkwentro.
Sarong patotoo pa na maski suboot an namamanwa, habo na sa piggigibong extortion o pangingikil kan mga rebelde na nagpapagabat sana sa saindang mga buhay.
