LEGAZPI CITY — Inomaw kan krinear na Task Force Sagip Para sa Mayon an marikas asin organisadong disaster response na ipigpapaotob ngonian sa Albay sa tahaw kan Mayon crisis.
Segun ki Task Force Mayon spokesperson Col. Patrick Cinco, magayon na hilingon an pagtatabangan kan mga local disaster risk reduction and management council mientras na namamatean man an presensya kan national government.
Dugang pa ni Cinco na nakikisumaro man an saindang lado sa nasabing setup kun saen nakaantabay sa presente para sa ibababang decampment order kun saen magtataong-asistensya sa manpower asin transportasyon sa rinibong evacuees na papaulion en kaso ibaba na sa Alert Level 3 status an bulkan.
Mientras tanto, apelar man kaini sa mga residente na dae muna magparabalik-balik sa mga harong asin magsunod sa mga direktiba hale sa mga otoridad tangarig na maasegurar na salbado sa kada aktibidad na nahihiling sa Mayon volcano.
An nasabing task force an compuesto kan mga personahes hale sa Philippine Army (PA), Philippine Navy, Philippine Coast Guard (PCG), Bureau of Jail Management and Penology (BJMP) asin iba pang law enforcement agencies.
