LEGAZPI CITY-Kinumpirma kan Department of Foreign Affairs (DFA) na natimbrehan na ninda an International Criminal Police Organization (Interpol) na nakansela na an pasaporte ni dating Ako Bicol Party List Representative Zaldy Co.
Segun kay Foreign Affairs Spokesperson Ambassador Angelica Escalona, naresibe kan DFA kan Disyembre 10 an resolution kan Sandiganbayan na nagsugo sa kanselasyon kan pasaporte kan dating mambabatas.
Paliwanag kan DFA official na naipaaram na man ninda sa Interpol office sa Pilipinas, na Philippine Center on Transnational Crimes, an kanselasyon kan pasaporte ni Co.
Kun sain ini ire-report sa Interpol national asin ititimbre sa gabos kan international border control ngani na mailaag sa alert system an pasaporte ni Co.
Pagabot man sa suboot posibleng kapoy ni Co na golden passport, sinabi kan DFA official na an Portuguese government an makakasimbag digdi.
Sinabi pa kaini na dapat bako gabos na Pilipino an nakakakuwa kan foreign citizenship asin foreign passport an nagrereport sa DFA.
Marurumduman na kan Biyernes, kinumpirma ni Department of the Interior and Local Government (DILG) Undersecretary for Public Affairs and Communications Donnie Puno na pinoonan na kan ahensya an pakikipag-koordinar sa gobierno kan Portugal ngani maberipika an nasabing report kasunod sa Portuguese passport ni Co.
Naenot na man na ipigsiwalat ni DILG Sec. Jonvic Remulla na namonitor an huring lokasyon ni Co sa Portugal.
