LEGAZPI CITY—Nairehistro an Intensity I sa banwaan kan San Fernando sa provincia kan Masbate makalihis an magnitude 5.4 na linog kasoodmang Lunes sa parte kan Claveria kan kaparehong provincia.
Segun ki Municipal Disaster Risk Reduction and Management Office San Fernando Head Mariane Joy Alindogan, sa intrevista kan Bombo Radyo Legazpi, na nagluwas sa edificio kan saindang ofisina an mga personahes, asin wara man na nairehistrong mga nairido.
Dugang ni Alindogan na padagos man sindang nagkukundusir nin Simultaneous Earthquake Drill asin igwa nin information campaign sa mga eskwelahan urog na pig-obserbar ngunyan na bulan an National Disaster Resilience Month.
Mientrastanto, nilinaw man kan opisyal na bako sa saindang lugar nangyari an mga report na may mga idinarang estudyante sa ospital makalihis an pagyugo kaya mensahe man kaini na kaipuhan muna i-double check an detalye bago i-post an mga siring na impormasyon.
Sienerto man kaini na gabos na namamanwaan kan San Fernando an salbado gikan sa naumbitang linog.
