LEGAZPI CITY-–Nairehistro an Intensity I na linog sa ciudad kan Legazpi, makalihis an nangyaring pagyugo nin 5.8 magnitude sa Cebu kan Lunes nin maagahon, susog sa datos kan Philippine Institute of Volcanology and Seismology.
Segun ki DOST-PHIVOLCS Masbate Head Leni Torrevillas, sa intrevista kan Bombo Legazpi, ini an kabale pa sa aftershocks kan 6.9 magnitude na linog sa Northern Cebu kan nakaaging Setyembre 30.
Sa presente, nakapagrehistro na an saindang ahensya nin labi sa 11,860 na aftershocks huli kan nasabing linog.
Tinawan-duon ni Torrevillas na huli sa kusog kan linog an kaya naeksperyensyahan ini sa iba pang lugar kan nacion.
Nagpagiromdom man an opisyal na magpartisipar sa mga pigkukundusir na earthquake drill nganing preparado asin aram an gigibohon en kaso magkaigwa nin mga paglinog.
Importante man suboot na dapat matibay asin nagsunod sa National Building Code of the Philippines an mga pigkonstruir na edificio asin imprastraktura.
Dugang niya na en kaso may makusog na linog an dae tulos na magbalik sa edificio na partially damaged huli sa mga posibleng aftershocks.
Siring man na importante na aram kun ano an pwedesir na epekto kan makusog na pagyugo sa lugar na pinagteteniran kan sarong indibidwal nganing aram kun ano an saindang gigibohon sa oras nin paglinog.
