LEGAZPI CITY – Ipiglunsar an sarong inisyatibang Pink Techno Classhome sa Gubat North Central School nganing mapauswag an pagbasa kan mga estudyante.
Segun ki Michelle Rubio, Master Teacher 2 kan naunambitang eskwelahan sa intrevista kan Bombo Radyo Legazpi na pigrerepresenta kan kulay na pink an pagkamoot asin an techno an manungod sa teknolohiya asin an classhome man an mapadapit sa pagtataong buhay sa ordinaryong classroom.
Obheto kan nasabing inisyatiba na mapauswag an speaking skills kan mga estudyante huli ta may ipigbugtak man sindang microphone asin speaker nganing magamit kan mga estudyante sa saindang pagsimbag sa recitation asin pagbabasa.
Mawot niya man na ma-eksperyensya kan mga joven na magbasa mantang nakatukaw sa mga mayuyumok asin komportable na higdaan nganing ma-enganyar an mga ini na maglaog sa eskwelahan uru-aldaw.
Pigtaram pa kan paratukdo na nasa poco mas o menos rinibo na mga estudyante an na-benipisyuhan kan saindang inisyatibo huli ta pwedesir maglaog an mga grades four to six nganing magbasa nin mga libro.
Pigpapalitan man ninda an pagsasa-ayos kan nasabing classhome nganing ma-enganyar an mga estudyante kada pigbabago o may pigdudugang sinda sa laog kaini.
Huli ta warang dakulang budget an eskwelahan kun kaya labi ang pasasalamat ninda sa mga indibidwal asin mga bookstore na nagdodonar nin mga libro mantang may iba man na nagdonar nin aircon asin tv.
Pighayag pa ni Rubio na labi man an pasasalamat kan mga magurang kan mga estudyante huli sa tabang na ipigtao kan Pink Techno Classhome sa pag-uswag kan speaking skills kan saindang mga aki.
