LEGAZPI CITY—Bistado na kan mga otoridad an indibidwal na nasa likod kan suboot online threat sa Catanduanes National High School.
Magigiromdomang naglakop sa social media an sarong screenshot na suboot nagpapahiling kan sarong persona na may pangaran na “Nate Nate” an nagpadara nin mensahe nin pagbabanta nin pananaksak sa nasabing eskwelahan.
Segun ki Virac Municipal Police Station Chief of Police Police Major Kenneth Ding Gutierrez, sa intrevista kan Bombo Radyo Legazpi, naghagad sinda nin digital forensic examination sa mga posibleng pinagmulan kan social media post asin an mismong nagpadara kan mensahe.
Huli kan mahigot na imbestigasyon kan Virac MPS asin Catanduanes Provincial Cyber Response Team napag-araman na an pinagmulan kan nasabing online threat an sarong menor de edad na estudyante man kan nasabing eskwelahan.
Sa ngunyan naresolbar na an kaso, nagsasairarom na sa intervention programs kan Women and Children Protection Desk asin Virac Municipal Social Welfare and Development Office magin sa eskwelahan an menor de edad.
Inasigurar nman ni Gutierrez na padagos man liwat an saindang security asin public safety measures na piggibo sa nasabing banwaan.
Mientrastanto, pagiromdom kaini sa mga magurang kan joven na bantayan nin maray an saindang mga aki o paglimitar sa paggamit nin internet ninda; siring man an patanid sa mga estudyante na dae madawit sa mag siring na aktibidad.
