LEGAZPI CITY- Labing pagbasol asin panghihinayang kan sarong Indian national makalihis na madiskubreng nawawara an makantidad na gamit sa pigtetenirang harong sa Purok 2 Brgy. 40 Cruzada sa ciudad kan Legazpi.
Binisto an biktimang si Bhalala Kamalkumar Tribhovanbhai, 18-anyos.
Susog sa inisyal na imbestigasyon kan Legazpi City Police, wara man nahiling na senyales kan puersahang paglaog sa harong.
Alagad segun sa nasabing dayuhan, ikinaag niya an kolor abong laptop na nagkakantidad nin P47, 500 sa higdaan na harani sa bintana na nakabukas kun kaya digdi man posibleng inabot kan mga parahabas.
Sa presente, padagos pang pigbeberipikar kan pulisya an nasabing insidente.
