LEGAZPI CITY- Dae napugulan kan ina kan babaye na pinagtutubudang nilugusan muna antes na ginadan na nadukayan sa sarong liblib na lugar sa banwaan kan Castilla sa Sorsogon, na iluwas an namamateang kulog katakod kan insidente.
Naagnas na an bangkay ni Diana Rose Aviso Baradia, 21 anyos kan madiskubre sa Brgy. San Isidro kun saen base sa ikinondusir na imbestigasyon, saksak sa daghan asin bungag an sinapar kaini antes na magadan.
Makusog an pagtubod kan ina na an CAFGU member na si Martin Periña an may kagibuhan kan krimen dawa pa todo pahimutik ini.
Base kaya sa mga testimonya, ini an huring nahiling na kaibanan kan aki na lunad sa motor.
Nagtutubod man an dae na pinangaranang ina na totoo an huruding-huding sa relasyon kaini sa biktima na nag-ugat sa pagigin textmates.
Minsan na suboot man ining tinaraman kan ina kan biktima na dae pagtentaran si Diana huli ta may agom naman ini asin dos anyos na aking lalaki alagad nagpadagos man giraray palan an tagong relasyon kan duwa.
