LEGAZPI CITY—Posible suboot na magtaong-dalan sa ibang political parties na magdomina sa lado politika kan Pilipinas an impeachment cases na pigsunad laban ki Bise Presidente Sara Duterte.
Segun ki Far Eastern University Department of Political Science Faculty Prof. Amr Solon Sison, sa intrevista kan Bombo Radyo Legazpi, na an nasambit na impeachment laban sa bise nagsasapinal kan “diborsyo” kan UniTeam, makrear nin major civil war sa pagultangan kan grupo ni Marcos asin Duterte sa politika kan Pilipinas, asin makrear nin mga oportunidad para sa ibang grupo na posibleng magdomina sa lado politika kan nasyon.
Dugang pa ni Sison na an impeachment sarong representasyon kan political maneuvering kan mga makapangyarihang angkan asin koalisyon na nagbabalo na ‘i-outdo’ o ‘i-outmatch’ an lambang saro para sa mga masunod na peryodo kan eleksyon.
Pig-eksplikar man kan propesor na saro sa positibong bagay sa kasaysayan kan politika sa nasyon iyo an tunay na huma kan impeachment sa mga elihidong opisyal lalo na sa mga pwedesir na i-impeach siring kan presidente, bise presidente, ombudsman, COMELEC chairman, asin supreme court justices, kun saen boot-sabihon na kun dae ninda piggibo an saindang trabaho—an saindang job security nasasairarom sa sarong huma o impeachment.
Tinawan-doon man kaini na an presidente asin bise-presidente dae basta-basta pwedesir na kasuhan huli ta may immunity sinda, alagad pwedesir sindang matangkas sa posisyon. Alagad, dugang niya, na an problema minsan iyo an nawe-weaponize an impeachment.
Para man saiya na an impeachment saro sa mga forefronts kan kampanya kan mga nagkapirang opisyal na nagdadalagan sa nagkapirang posisyon ngunyan na papaabuton na eleksyon.
Mientrastanto, pigtaram man ni Sison na mas magayon na magkaigwa nin maayos na procedural process maski pa sabihon na politically-motivated an sarong bagay.
