LEGAZPI CITY – Ipigbuyagyag kan Gabriela Bicol na nakipag-olay na sinda sa iba pang miyembro kan grupo sa Sorsogon katakod kan rape slay case sa nasambitan na probinsya ngani na makaolay kaini an pamilya kan biktima na si Diana Rose Razo.
Marurumduman na piglugusan asin ginadan si Razo kun sain mga miyembro nin CAFGU an pinagtuturo na nasa likod kan nasambitan na krimen.
Segun ki Jen Nagrampa, mawot ninda na magtao nin suporta asin advice sa pamilya kaini ngani na magkaigw nin kusog buot na ipagpadagos an pagsasangat nin kaso.
Nangapudan man ini sa militar na ingwahon na matawan nin hustisya an biktima asin magsagibo nin iba pang mga lakdang apwera sa pagsasakustodiya kan mga suspek na CAFGU members.
Dugang pa ni Nagrampa na kinakaipuhan nin mas mahigot na imbestigasyon huli ta bako sana ordinaryong tawo an mga nasa likod kan krimen.
Mientrastanto, binatikos man kan grupo an motto kan kapulisan na ‘to serve and protect’ huli ta hali mismo suboot sa saindang lado an mga nagigibo nin kalokohan.
Huli digdi, nangapudan ini na disiplinahon an saindang mga tauhan ngani na dae magkusog an buot na gumibo nin iligal na mga aktibidad.
