Pigsyerto ni Senate Blue Ribbon Committee acting chairman Senador Erwin Tulfo na magpapadagos an imbestigasyon kan Senado mapadapit sa mga maanomalyang flood control projects.
Sinabi ni Tulfo na maski kanselado muna an nakatalaang pagdangog, piglalaomang posibleng maipagpadagos ini sa ikatulong semana kan Oktubre, sa tahaw kan mga budget hearing kan Senado.
Siring man, pigtawan doon kan senador na kadakol na isyung dapat mang matutukan afuera sa flood control projects.
Dapat man suboot na matutukan an isyu sa presyo kan pagkaon, importasyon na nakaaapektar sa mga paraooma asin sa kakulangan nin tabang kan PhilHealth sa mga pasyente.
Mientrastanto, kinumpirmar man ni Tulfo na nagka-olay na sinda ni Senate President Vicente “Tito” Sotto III mapadapit sa pagpapadagos kan imbestigasyon.
Segun kay Tulfo, malinaw an direktiba ni Sotto na padagos an pagsisiyasat asin kun may masapol suboot na “big fish” an dapat na mabunyag.
Pigtawan doon liwat ni Tulfo na obheto kan imbestigasyon na makabilog nin ley na magbabawal sa mga mambabatas na makiaram sa implementasyon kan mga proyekto.
Ini suboot an nahihiling na paagi nganing malikayan an korapsyon sa mga proyekto kan gobierno arug kan flood control.
