LEGAZPI CITY- (Update) Aabuton nin sarong bulan an ipigsasagibong imbestigasyon kan Civil Aviation Authority of the Philippines (CAAP) katakod kan nagsadsad na Gulfstream G200 jet na igwang registry number na RP-C280 sa ipigko-construir na Bicol International Airport sa Brgy. Alobo, Daraga, Albay.
Sa intrevista kan Bombo Radyo Legazpi ki CAAP spokesperson Eric Apolonio, nasa site na an accident investigators kan ahensya tangarig na maaraman an totoong rason kan emergency landing kan nasabing eroplano.
Enot naman kayang nagluwas sa inisyal na imbestigasyon na sa Legazpi Airport dapat na malapag an executive jet alagad dae pa man maaraman an rason kun nata sa ipigko-construct na erpuerto ini naglanding.
Nagtutubod man an nagkapirang nakahiling kan insidente na resulta kan ‘wind drop’ an nangyari o an kusog nin paros na nagbubusol sa eroplano.
Nakatalaan man na dangugon an mga isusumiter na report kan mga piloto asin iba pang anggulo sa insidente kaya mahahaluyan pa suboot an pag-iimbestigar asin pagpapaluwas kan final assessment report.
Pighahalat pa sa ngonian an coordination kan operator kan eroplano sa ahensya tangarig na maihale na sa runway an eroplano.
Mientras tanto, inasegurar man ni Apolonio na nag-aagi sa masusing inspeksyon an mga siring kaining klase nin eroplano tangarig na masierto na salbado ining gamiton.
