Matrayumpong naibalik sa laog kan Menor Basilika asin Pambansang Dambana kan Jesus Nazareno an imahe asin andas kan Poon ngonian na aldaw.
Pirang minuto antes mag-alas onse nin aga, an imahe kan Nazareno dagos nang nakalaog sa Simbahan nin Quiapo asin dagos nang natapos an Traslacion 2026.
Sa historya kan naunambitang prusisyon, an Traslacion ngonian na taon puwedesir konsideraron na pinakahalawig o pinakahaloy.
Makalihis na mag-poon ini kasuhapon, ika-siyam kan Enero sa Quirino Grandstand, sa oras na alas-kwatro nin maagahon, uminabot sa 30-oras asin 50-minuto antes naka-abot pabalik kan Simbahan.
Kun pagbabasehan an mga nakalihis na rekord, nalagpasan kaini an durasyon na nasa 22-oras kan taong 2012 asin 2017.
Kaya man sa pagbabalik kan Poong Jesus Nazareno, ikina-ugma ini urog na kan mga deboto na matiyagang naghalat sa simbahan.
Segun kay Rev. Fr. Robert Arellano, LRMS, an Parochial Vicar kan Quiapo Church, saro sa mga rason kan halaba asin mabantol na Traslacion iyo an pagsampa kan mga deboto sa mismong andas.
Ini sa ibong kan pangapodan kan simbahan na magpundo na asin ipagbawal an pagsakat o paglukso sa andas kan Poon.
Idinagdag pa kan padi na afuera sa dae mapugulan na pagsunad kan mga deboto sa andas, saro sa pangenot na rason kun nyata naghaloy an Traslacion iyo an pagsabat sa ruta na pig-aagihan kaini.
An ibang grupo kaya imbes na magtulak hale sa likod, sinabat an karwahe kan Poon hale sa enotan, na nagpadepisil sa pag-abante kaini.
