LEGAZPI CITY- Inasegurar kan Bureau of Immigration (BI) an pagberipikar kan mga ipigdudulok na concerns sa mga dayuhan na nagtatrabaho sa rehiyong Bicol siring man an pagplantar kan magkakanigong lakdang en kaso na maprobarang totoo an nasabing alegasyon.
Ipighayag ni BI Acting Alien Control Officer Joanna Occiano sa intrevista kan Bombo Radyo Legazpi na wara pa man sinda sa ngonian na naoobserbaran na dakol na isyu kontra sa mga Chinese na nagtatrabaho sa rehiyon urog nang wara man na Philippine Offshore Gaming Operator (POGO) digdi.
Diit man sana suboot an namomonitor na illegal Chinese workers sa laog nin apat na taon.
Sa ibong kaini, tinawang-duon kan opisyal na maikokonsiderar na iligal an pag-istar asin pag-ako kan mga ini sa nacion kun warang magkakanigong visa na nakakaputan mantang offense man ini para sa pagkakaag sa blacklist.
Ipigheras pa kaining kaibanan sa pagroseso kan work visa an pagkua man kan Alien Employment Permit (AEP) na saro sa mga rekisitos mantang issued man kan Department of Labor and Employment (DOLE) an nasabing permit na itatao kun sain nakatalaan na magtrabaho.
Mientras tanto, ipigbuyagyag ni Occiano na sarong supplier nin cellphone sa runa an pigmomonitor huli sa kwestyunableng mga Chinese nationals na employers mantang pigtutukan man an iba pang nationality.
Enot naman na pinapaimbestigaran kan Senate Commitee on Labor an nanonotaran na pagdakol kan mga illegal foreign workers sa Pilipinas.
