LEGAZPI CITY – Pigbabasol kan Gobierno Local kan Legazpi sa mga ilegal na pagtapok nin basura sa mga salog asin improper waste management an mga nangyayaring pagbabaha sa saindang ciudad.
Segun ki Legazpi City Mayor Alfredo Garbin sa intrevista kan Bombo Radyo Legazpi na nagkokontribwer suboot ini sa pagbara kan mga kanal urog nang nag-uuran kun kaya marikas na nalulubog sa baha an mga nagkapirang kakalsadahan kan syudad pag warang patod an namamateang pag-uuran.
Nag-aapaw man an mga salog nin huli sa mga basurang nakabara kun kaya nagbubulos na an mga ini sa mga residential area.
Huli kaini, kahagadan niya an disiplina kan lambang saro mapadapit sa proper waste management.
Pig-asigurar kan opisyal na fully operated na an mga pumping station sa ciudad asin pigtao na ninda an pag-operate asin pag-maintenance kaini sa Department of Public Works and Highways Region 5 mantang wara mang patod an pigsasagibong paghakot kan basurang nakatambak sa mga Material Recovery Facility.
Makakatabang suboot ining pagtaong aksyon sa basura urog nang tatapuson na an kontruksyon kan international cruise ship terminal sa ciudad na mas mapagayon pa asin mapauswag an turismo kan Legazpi.
Dae ini matugot na mamidbidan kan mga turista na pano nin basura an Legazpi kun kaya pigagibo ninda gabos nganing maparikas asin mahakot tulos an mga basurang nakatambak sa ciudad.
Kahagadan ni Mayor Garbin an kooperasyon kan lambang saro nin huli ta responsibilidad ini kan kada tagharong na naipapaotob an proper waste segregation hasta sa maitapok ini sa dump site asin an tamang pagtapok nin basura.
