Pigkakarkulong madurar nin sarong oras asin 20 minutos an ikalimang State of the Nation Address (SONA) ni Presidente Ferdinand Marcos Jr. ngunyan na Hulyo 27, 2026.
Segun ki Palace Press Officer Claire Castro, ini an nagin dalagan kan oras kan speech kan presidente durante kan saiyang huring preparasyon.
Siring man, nilinaw kan Malakanyang na posible ining magbago, posibleng maglawig o maghalipot nin diit, depende sa rikas kan pagbabasa asin reaksyon kan mga maatendir sa Batasang Pambansa sa Quezon City.
Mapuon an ulat sa bayan kan presidente atyan na alas-4:00 nin hapon.
Magiging simple alagad marangal suboot an SONA kan presidente ngunyan na taon susog sa direktiba, kaya warang tradisyunal na engrandeng fashion show o mga bistong celebrity performers.
Napili an PCSO Chorale, na nanggana sa Grand Prix sa 2026 Korea International Choir Competition, na makanta kan Philippine national anthem.
Pinaglalaoman na ihahayag kan presidente an mga nagibo kan saiyang administrasyon, mga lakdang kontra sa korapsyon, mga plano sa ekonomiya, asin mga prayoridad na ley pra sa huring duwang taon kan saiyang termino.
