LEGAZPI CITY – Binalehan kan mga ka-jovenesan an isinagibong Paskuhan Job Fair ngonian na taon kan Legazpi City Public Employment Service Office (PESO).
Segun ki PESO Legazpi City Labor and Employment Officer III Arziel Ramirez sa intrevista kan Bombo Radyo Legazpi na binalehan an naunambitang job fair nin 11 companies na kadaklan an gikan sa Hotels asin Customer Services.
Mawot man nindang bumagay sa mga ka-jovenesan an mga kompanyang may job vacancies na saindang ipigbugtak mantang narisa man nindang diit sanang kompanya an nagkakaigwa nin hiring tuyong bulan kan Disyembre.
Uminabot man sa labi 100 na mga job applicants an nagpasa kan saindang mga resume sa 11 kompanya kun sain 6 katawo an pwedesir nang makapagpoon sa saindang trabaho makalihis na ma-hired on the spot.
Pigkokonsidera man kan opisyal na dakula na an naunambitang numero kan mga job applicants urog nang diit man sanang kompanya an nakisumaro kompara sa mga na-enot nindang mga job fairs.
Bukas man suboot an aktibidad sa gabos na mawot makahanap nin trabaho antes magsapit an pasko maski bako residente kan ciudad.
Pangapodan ni Ramirez sa publiko na aprobitsaran an Paskuhan Job Fair asin dae magduwang isip na magdulok sa saindang ofisina enkaso dae makaabot sa itinalaang aldaw kan aktibidad.
.){kind=link}