Inenganyar ni International Criminal Court (ICC) presiding judge Joanna Korner an prosecution asin defense na baluon na pakarahayon nin matanos o “To resolve amicably” an mga isyu katakod kan disclosure nin ebidensya sa crimes against humanity case ni dating Presidente Rodrigo Duterte.
Sa ikatulong status conference, sinabi ni Korner na mas makakatabang kun mareresolbar kan duwang lado an mga orolay na dae kinakaipuhan na umaksyon kan trial chamber.
Marurumduman na enot na nagpahayag nin reklamo si British lawyer Peter Haynes, legal counsel ni Duterte, dapit sa kadaklan kan mga dokumentong isinumiter kan prosekusyon.
Tinawan man kan korte an duwang lado nin tig-pitong aldaw ngani na magsumiter nin pleadings, kaibanan an motion kan defense asin kasimbagan kan prosekusyon.
Mientras tanto, sinabi ni ICC senior trial lawyer Julian Nicholls na inimbitaran niya si Atty. Peter Haynes na makipagpulong muna saiya antes magsumiter nin aplikasyon sa korte.
