LEGAZPI CITY – Hustisya an kahagadan kan pamilya kan nagadan makalihis badilon kan dae pa nabibistong persona sa Sitio Burabod, Barangay Taysan, Legazpi City.
Magigirumduman na susog sa imbestigasyon kan otoridad na mantang nag-oolay an duwang biktima sa hampang kan sarong establishimiento may sarong lalaki suboot na nag-agi na may kapot na arak asin may sinindihan ini na iginapo harani sa nasabing establishimiento asin binukod kan duwang biktima an suspek, alagad, pag-abot sa mabulod na lugar kan nasabing barangay, digdi na nambadil an nasabing suspek.
Segun ki Joan Abache, an agom kan biktima sa intrevista kan Bombo Radyo Legazpi na nagpaaram saiya an saiyang agom na maluwas huli ta mahiling suboot ini nin basketball asin mabakal kan saindang isira.
Makalihis an pirang oras an nabaretaan ninda na nakahandusay na an saindang agom na wara nang buhay asin may tama nin bala sa saiyang hawak.
Paghistorya pa kaini na sarong responsableng ama sa saindang aki asin mapinadaba na agom kun kaya blangko sinda sa motibo kan suspetsado sa pambabadil.
Pagdoon pa niya na nagresponde man sana kuta an saiyang esposo sa nangyaring kasulo sa lugar asin pigbalo na dakupon an may kagibo kaini.
Sa presente, pangapodan ni Abache sa suspetsado na makonsensya ini sa paggadan sa saiyang esposo asin hampangon an pagkakasala kaini sa ley.
