LEGAZPI CITY-Sarong humanoid na robot na gibo sa China an nakabasag kan 100-meters na rekord sa kinaban na itinao kan maalamat na runner na taga-Jamaica na si Usain Bolt.
Susog sa state broadcaster kan China, an robot, na inaapod na Lightning, na pigdevelop kan paragibo nin smartphone kan nacion, nagdalagan nin 100-meter dash sa laog sana nin 9.32 segundos sa sarong preparatory test event para sa World Humanoid Robot Games sa Beijing.
Mas marikas ini kaysa sa rekord sa kinaban ni Bolt na 9.58 segundos kan 2009.
An robot nakaabot sa pinakahalangkaw na rikas na 14.5 metros kada segundo. Ini man nakatalaan na magpartisipar sa mga kompetisyon nin humanoid robot, kaiba an mga running event.
Padagos na pigbubusol kan China an mga humanoid robot bilang sarong estratehikong industriya, orog na para gamiton sa manufacturing, logistics asin iba pang aplikasyon sa mga konsumidores.
Bako ini an enot na pagkakataon na si Lightning nagpahiling nin halangkaw na performance.
Kan Abril, nanggana man ini sa 21-kilometers Beijing half marathon sa oras na 50 minutos asin 26 segundos—mas marikas kaysa sa world-record pace kan elite human runners.
