LEGAZPI CITY – Nangapodan an human rights defender na KARAPATAN sa publiko asin sa gobierno mapadapit sa mga insidente nin pag-kidnap sa mga nagkapirang persona asin mga midbid na mga aktibista.
Kung babalikan, na kan Agosto 23 kan nakaaging taon an enot nang napabareta na nawawara si James Jazmines, makalihis na mag-atendir sa sarong birthday celebration kan saiyang amigo na si Felix Salaveria, Jr. sa sarong restaurant sa Brgy. San Roque, Tabaco City mantang kan Agosto 28 kan nakaaging taon man an napabareta na dinukot man si Felix limang aldaw makalihis mawara si James.
Segun ki KARAPATAN Vice Chairperson Edith Burgos sa intrevista kan Bombo Radyo Legazpi na 15 katawo na sa bilog na pilipinas an nawara poon kan magtukaw an presenteng administrasyon asin padagos pa suboot ining madakol hasta sa magbaba ini sa pwesto.
Grabe man suboot an epekto na winalat sa mga pamilya nin huli ta pirang bulan asin taon nang warang aram kun napasain na an saindang kamag-anak.
Sa hiling niya man na poon pan panahon kan martial law an wara pang napapanimbag sa mga kapareho man na insidente na nangyari sa nacion.
Pigtawan doon pa kaini na dae suboot ini mangyayari kun pig-iimplementar an mga ley kan Pilipinas arug na sana kan Republic Act (RA) No. 10353 o an mas bisto na Anti-Enforced or Involuntary Disappearance Act of 2012.
Mensahe kan saindang grupo na maherak man an mga may kagibo kan mga pandurukot nin huli ta parareho nindang may mga pamilya an nasabing mga nawawarang persona.
Siring man an saindang pangapodan sa mga nakatukaw sa lokal na gobierno na aksyunan an siring kaining insidente nin huli ta magigin “black eye” ini sainda kun dae magsasagibo nin magkakanigong aksyon mapadapit sa mga insidente kan pandurukot sa saindang mga lugar.
