Sarong bagong pag-aadal an nagtaram na mas naglangkaw an peligro kan matinding pag-uran sa Pilipinas asin sa iba pang parte kan Southeast Asia huli sa padagos na pagbabago kan klima.
Segun sa research na “Unseen but Increasing: Recent Changes in Risk of Extreme Precipitation over Southern Africa and Southeast Asia,” ginamit kan mga siyentipiko an mga climate model ngani na mapag-adalan an extreme rainfall puon 1981 hanggang 2024.
Nagluwas sa pag-aadal na naglangkaw an posibilidad kan makusog na pag-uran sa rehiyon.
Sa nagkapirang mga lugar, kaibanan an darakulang ciudad sa Southeast Asia asin Africa na posibleng madoble an huma kan matinding pag-uran sa nagkapirang bulan.
Partikular sa Pilipinas kun sain nahiling sa pag-aadal na sa southern Philippines, pinakahalangkaw an huma puon Hunyo hasta Nobyembre, mantang sa northern Philippines, puon Nobyembre hasta Mayo asin sa central Philippines, mas halangkaw an risk tuyong Agosto hasta Oktubre, kasabay pa kan peak kan bagyo.
Segun sa mga researchers na an Metro Manila na dating nakakaeksperyensya nin “once in 100 years” na extreme rainfall, alagad ngunyan, posibleng mas magin madalas.
Ipinahiling man sa projection na padagos an paglangkaw kan risk kan extreme rainfall sa masunod na duwang dekada.
