Pinaghahandaan na kan House Prosecution panel ang nakatakdang oral arguments mapadapit sa orolay kan 2/3-vote threshold sa nagpapadagos na impeachment trial laban kay Vice President Sara Duterte.
Masagibo nin oral arguments ang Senate Impeachment Court sa masunod na semana kun sain inimbitaran man an mga retiradong mahistrado kan Korte Suprema nganing magtaong linaw sa tamang pagkwenta kan 2/3 vote hale sa kabilogang miyembro kan Senado, partikular na para sa mga senador na dae nakikisumaro sa paglilitis.
Segun ki Atty. Hez Montalan, Deputy Spokesperson kan House Prosecution panel, masusing sinusuri kan saindang legal team ang gabos nin katakod na ley asin jurisprudence na saindang ihahampang sa korte.
Inihayag kan abogado na pabor ang lado kan prosecution na baguhon an denominator hale sa kabuuang 24 na senador asin ibilang sana an mga aktibong nakikibahagi sa trial, mantang pigrerespeto pa man giraray ninda an magigin huring desisyon kan impeachment court.
Mientrastanto, nanindugan man an House panel sa importansya kan pagpaapod kay Davao City Mayor Baste Duterte makalihis aprubaran kan impeachment court ang pagpapadara nin subpoena para sa saiyang paghampang ngyunyan na semana.
Lilinawon suboot kan panel sa alkalde an mga record kan negosyo ng Bise Presidente na nasa irarom kan Office of the City Mayor, asin nilinaw na an pagpapaapod saiya an basado sa opisyal na kapasidad asin warang kinaaraman sa pagigin magtugang kan duwa.
