LEGAZPI CITY- Aminado an sarong political analyst na warang napiga an House Prosecution panel hali sa testigo na si dating Office of the Vice President (OVP) special disbursing officer Gina Acosta.
Segun ki Prof. Froilan Calilung sa intrevista kan Bombo Radyo Legazpi na huli sa warang makuwa na kasimbagan, nagresulta ini sa grandstanding kan nagkapirang senator-judges.
Dugang pa kan opisyal na wara na na-establishar na paper trail na ki Vice President Sara Duterte napasiring an dakulang kantidad hali sa confidential funds.
Sa ibong kaini, sinabi kan propesor na kun iisipon, bako kasalan kan testigo huli ta dapat na an prosekusyon an nagi-extract nin impormasyon asin kasimbagan urog pa na sinda an nag-subpoena ki Acosta.
Sinabi ni Calilung na kun matibay an prosekusyon, makukuwa kaini an mawot na impormasyon maski pa gurano katagas an sarong testigo.
Mientras tanto, sinabi kan propesor na pinakamagayon na lakdang sa ngunyan iyo an ipaapod si Colonel Raymund Lachica makalihis na nagkapirang beses na mabanggit an pangaran kaini sa paglilitis.
