Nagpahayag nin kumpiyansa an House prosecution panel na mabalik tulos an impeachment trial ki Bise Presidente Sara Duterte makalihis na pormal na magtiripon an Senado bilang impeachment court.
Segun kay Lead prosecutor asin Batangas Rep. Gerville “Jinky Bitrics” Luistro na warang legal na ulang sa pagpadagos kan paglilitis huli ta wara man nin nin temporaryong restraining order an Korte Suprema.
Nanindugan si Luistro na an mandato kan konstitusyon na “forthwith” bako sana para sa pag-convene kan impeachment court kundi para man sa tulos na pagpuon kan trial, kabale na an pagpresentar nin mga ebidensya asin testigo.
Piglinaw man kaini na magpapadagos an pagbista dawa dae mag-atubang o dae magsumiter nin simbag si Duterte sa reklamo, huli ta automatic ining ikokonsiderar na plea of not guilty segun sa Senate rules.
Mientrastanto, sinabi ni Akbayan Rep. Chel Diokno na preparado na an prosecution panel para sa paglilitis asin wara sindang nahihiling na ulang sa proseso.
Enot nang pigsugo kan Senado si Duterte na magsumiter nin simbag sa articles of impeachment sa laog nin 10 aldaw poon sa pagresibe kan summons.
Pagkatapos kaiyan, itatakda na an pre-trial asin trial proper.
