LEGAZPI CITY-“No show” liwat si Vice President Sara Duterte sa nagpapadagos na impeachment proceedings kan House Committee on Justice ngonian na aldaw nin Miyerkules.
Segun kay Committee Chairperson Rep. Gerville Luistro, bako bastante an mga pahayag sana kan Bise Presidente sa luwas kan Kongreso huli ta ang tamang lugar ngani magpaliwanag, iyo an hampangan kan komite.
Sa pagbubukas kan pagdangog, nilatag ni Luistro an tinagurian niyang “body of evidence” na nakalap poon sa mga nakalihis na testimonya asin dokumento.
Kabale digdi an mga minasunod:
– Pahayag ni Ramil Madriaga na P125 milyon na confidential funds kan Office of the Vice President na na-disburse sa laog nin 24 oras.
– Mga notice of disallowance hale sa Commission on Audit (COA) katakod kan P73 milyon kan taong 2022 asin tulong disallowances kan 2023 na nag-abot sa P375 milyon.
– Testimonya kan NBI na igwang saro sanang pirma sa mga resibo kan confidential funds maski pa magkaiba an pangaran na nagresibe.
– Pagpapatunay kan Philippine Statistics Authority (PSA) na an nagkapirang pangaran na nakaresibe kan pondo, iyoan warang rekord sa civil registry.
Sinabi ni Luistro, bako pasaro-saro an ebidensiya kundi may mga koneksyon, na nagpapahiling nin pattern sa paggamit kan confidential funds.
Mientras tanto, nagatendir man sa pagdangog si dating Senador Antonio Trillanes IV ngani magsumiter kan mga dokumento katakod kan suboot unexplained wealth ni Duterte.
Nag-atendir man sinda Assistant Ombudsman Mico Clavano, Ombudsman Jesus Crispin Remulla, asin BSP Governor Eli Remolona Jr. bilang mga resource persons.
Tinuligsa naman kan kampo ni Duterte an proseso, na inapod nindang “mini-trial” na suboot nagpapahiling kan “abuse and corruption” kan nagkapirang miyembro kan komite.
