Nangapudan si House impeachment team adviser asin spokesperson Ace Barbers nin diit na paghahalwag sa pagpapaotob kan sub judice rule sa paglilitis sa impeachment ni Vice President Sara Duterte.
Segun ki Barbers na dapat tugutan an mga prosecutors na matawan nin factual na impormasyon dapit sa mga nangyayari sa paglilitis, basta dae pigtutukar an merito kan kaso o binalo na impluwensyahan an mga senator-judge.
Sa ibong kaini, sinabi ni Barbers na masunod an House impeachment team sa kasuguan kan impeachment court.
Sa irarom kan Senate impeachment court Presiding Officer Sen. Francis “Chiz” Escudero, ipinagbabawal an pampublikong pagtukar sa pinagtatalunang facts, kredibilidad kan mga testigo, gabat kan ebidensya, legal na depensa o kaso, asin posibleng resulta kan paglilitis.
Pigduon ni Barbers na importante na matawan an publiko nin tama asin malinaw na impormasyon dapit sa impeachment trial ngani na maibitaran an paglakop kan salang impormasyon.
Dugang pa kaini na dapat pare-parehong ipaotob an sub judice rule sa gabos na sakop kaini, kaiban an mga senator-judge.
