LEGAZPI CITY – Alagad aprubado na sa ikatulo asin huring pagbasa sa Kamara an House Bill (HB) 4727 o restoration kan death penalty bill, dae pa man ini maisasaley tulos.
Segun ki AKO-Bicol Party-list Rep. Rodel Batocabe, ipapadara pa ini sa Kongreso asin bahala man ini na magpasa nin bersyon saka magkakaigwa nin komite na kumpwesto nin representantes hale sa Kamara asin Senado.
Digdi suboot pag-oolayan an pagkakaiba-iba kan bersyon kan propuesto asin kun wara man, mapirma an mga ini na uyon na sinda.
Makalihis na pirmahan, ibabalik suboot ini sa Kongreso asin sinda na an maapruba antes na darahon ki Pres. Rodrigo Duterte para sa pinal na pirma.
Oras na mapirmahan, mahalat pa suboot nin 15 aldaw saka maisasaley an nasabing propuesto.
Mientrastanto, nilinaw pa ni Batocabe na dipisil magkaigwa nin compromise bill kun kaya pig-amiyendahan ini na ilimita an coverage sa drug-related offenses bilang pagsuporta sa kampanya kan administrasyon kontra sa iligal na droga.
Dae man kasabay sa death sentence an plunder, rape asin treason na kun saen segun sa kongresista pwedesir na isunod oras na maipasar an propuesto.
Segun pa sa opisyal, bako man talaga ini death penalty kundi, pontius pilate bill huli sa paghuhugas-kamay.
Bako man kaya suboot mandatory an death penalty huli sa tinawan nin libertad an huwes kun matao nin life sentence o maximum death penalty sa mga preso.
