LEGAZPI CITY- Nakatalaan nang sunadan nin kasong Direct Assault asin Disobedience upon Person of Authority an sarong persona makalihis na kulugan an pulis na nagsita digdi sa ipigpapaotob na checkpoint sa ciudad kan Sorsogon.
Napag-araman na nagkokondusir nin Oplan Sita an mga personahes kan Sorsogon City Police Precinct 2 sa Brgy. Salog sa nasabing ciudad kan mag-agi si Aldin Caubang, 47-anyos na napag-aramang empleyado kan sarong ospital sa lugar.
Pinapundo ini kan kapulisan para sa inspeksyon kun saen nagpalyar pang magpresentar kan mga pighahagad na magkakanigong dokumento sa pigmamanehar na itom na motorsiklo na wara man na plaka.
Alagad imbes na makipag-kooperar sa proseso, nagsayuma an persona na ihayag an pagkakabisto asin agresibong siniko an pulis na nabistong si PO2 Annabelie Constante na tinamaan sa toong braso.
Katakod kaini, tulos man na dinara sa hepatura kan pulis an lalaki tangarig na isairarom sa magkakanigong disposisyon.
