Pigkwestyon ni Senate Deputy Minority Leader Risa Hontiveros an ladawan kan businessman na si Tony Yang kaiba si dating Philippine National Police (PNP) Benjamin Acorda Jr.
Si Tony Yang an tugang na lalaki ni Michael Yang, na sarong economic adviser kan nakalihis na Duterte administration.
Sa nagpapadaog na imbestigasyon kan senado sa iligal na POGO hubs, pinahiling ni Hontiveros an mga ladawan ni Tony Yang na may kaibang tulong lalaki kun saen saro digdi pigturo ni Yang na si Acorda.
Pinagtibay man ninda Hontiveros asin Senate President Pro Tempore Jinggoy Estrada an nasabing ladawan kun saen kuha ini kan regional director pa si Acorda sa Region 10 o sa Northern Mindanao.
Sinabi ni Yang na bistado niya si Acorda kan siya an nasa Cagayan pa.
Apwera digdi, pinahiling man ni Hontiveros an ladawan ni Yang kaiba sinda retired General Lawrence Coop, former Regional Director sa Northern Mindanao, Colonel Lemuel Gonda, an chief kan Regional Cybercrime Unit for Northern Mindanao, asin Colonel Aaron Mandia, an dating Cagayan City police director.
Pigkompirmar ni Yang sa Senate panel na bistado niya an mga opisyal kan PNP kun saen nabistadohan niya ini sa paagi kan Cagayan Business Federation.
Dugang pa ni Yang na nagkaigwa ini nin oportunidad para mamidbidan an mga nasabing opisyal kan PNP partekular na sa saindang pangangaipo na matabangan sinda para sa kaligtasan kan saindang komunidad.
Hinapot pa ni Hontiveros kun close sinda ni Yang asin dating Presidente Rodrigo Duterte.
Simbag man kaini na nagkaigwa siya nin tyansa na ma meet an dating Presidente sa isinagibong meeting kaiba an mga Chinese business groups sa Cagayan de Oro asin nagkaigwa nin oportunidad na makapa picture sa nasabing dating Presidente.
