LEGAZPI CITY – Ipig-eksplikar kan Commission on Election Albay an honoraria na mareresibi kan mga paratukdo na maserbi sa 2025 National asin Local Elections.
Segun ki COMELEC Albay supervisor Atty. Ma. Aurea Bo-Bonao sa intrevista kan Bombo Radyo Legazpi na depende an sa saindang posisyon na gagampanan sa eleksyon an saindang honoraria na makukuwa.
Basado sa saindang inisyal na datos, makakaresibi nin P12,000 an sa chairperson, P10,000 sa poll clerk asin P8,000 para sa third member.
An ibang election officer suboot an kalimitang pigtatawanan na tulos asin an iba natatawan man pakatapos na kan pirilian.
Pigtaram pa kan opisyal na iinuton muna ninda an pagprint kan certified voters list nganing masertipika na ini kan election registration board bago mag February 6 asin isasagibo na an training sa mga trainors na matrain sa mga paratukdo na isasagibo man sa maabot na Marso 3.
Diit na man sana suboot an kakaipuhanon na mga paratukdo nin huli sa saindang ginibong clustering kada presinto sa enterong provincia.
Saindang pigkuwa asin pigpili an mga paratukdo na nagserbi na man kan nakaaging automated election asin warang kapamilyang nagdadalagan sa politika.
Madali man sana suboot na magagamay kan mga paratukdo an bagong automated counting machine (ACM) nin huli ta makina lang an nagbago asin bako an paagi kan pagboto.
Sa ibong kan mga naglilipanang tarpaulin kan mga politikong madalagan sa bilog na provincia kan Albay, pangapodan ni Bo-Bonao sa mga aspirante na bako pa sinda kandidato kun kaya maghalat na sana kan campaign period asin magsunod na sana sa ley nin huli ta mas magayon suboot na pantay pantay na pagkampanya ngunyan na paparaning pirilian.
