LEGAZPI CITY – Nanindugan an nagkapirang Pinoy sa Hong Kong na nagtetenir na generally peaceful sa lugar sa ibong kan mahiwasang hiro-protesta bilang pagkontra sa extradition bill na ipigbubusol kan gobyerno.
Sa report ni Bombo Intenational Correspondent Federico Paragas Jr. sa Bombo Radyo Legazpi, nasa pitong distrito suboot an nakisumaro sa pinakahuring aktibidad kan mga protesters na piglalaomang madudugangan pa sa mga masunod na semana makalihis na magpahayag an 18 distrito nin simpatiya asin pagsuporta.
Apektado man an pagbuhay-buhay kan nagkapirang Overseas Filipino Workers (OFWs) sa nagkapirang dalan na naulangan, dagos man an trabaho mantang bukas an mga tindahan.
Kinontra man ni Paragas an mga nagsasabing pinag-aadalan an pagsuspinde kan pagpapadara kan mga OFWs sa Hong Kong huli sa kariribukan.
Garing “overkill” suboot an mangyari kun magkatotoo huli ta normal pa man suboot an dalagan kan buhay sa aro-aldaw.
Pagirumdom man kan Konsulada kan Pilipinas sa Hong Kong na mag-ibitar sa mga lugar na pigaganapan kan mga protesta, magin an pagsusulot nin kolor itom asin puti na nagsisimbolo sa pro asin anti-extradition bill activists.
