LEGAZPI CITY—Naarestar kan mga otoridad an pigkokonsiderar na high-value target sa kinundusir na buy-bust operation sa Brgy. Batang kan ciudad nin Ligao sa provincia kan Albay.
Segun ki Philippine Drug Enforcement Agency Bicol PIO Carlo Fernandez, sa intrevista kan Bombo Radyo Legazpi, binisto an suspetsado na sarong 49-anyos, lalaki, residente kan Barangay Layon kan naunambitang ciudad.
Nakumpiskar digdi an apat na pakete nin pinagtutubudang shabu na may gabat na haros 10 gramos, asin may kantidad na labi P68,000.
Naarestar ini sa paagi kan pinagsarong pwersa kan PDEA Special Enforcement Team, PDEA Intelligence Investigation Section kan PDEA Albay Provincial Office asin iba pang ahensya.
Dugang kan opisyal na haloy nang pigmamanmanan an suspetsado asin napag-araman na dakol na digdi an nakikipagtransaksyon nin mga ilegal na droga.
Sinabi ni Fernandez na an kalimitang kustomer kaini an gikan sa manlaen-laeng parte kan rehiyong Bikol.
Sa presente, nasa kustodiya na kan Philippine Drug Enforcement Agency Regional Office V an suspetsado asin pigpepreparar na an mga kasong isusunad laban digdi.
