LEGAZPI CITY—Timbog an sarong pigkonsiderar na high-value individual sa ginibong buy-bust operation sa Purok 1, Barangay Sua, sa banwaan kan Camalig, Albay.
Segun ki Albay Police Provincial Office Provincial Director Police Colonel Noel Nuñez, sa intrevista kan Bombo Radyo Legazpi, binisto an suspek na sarong 36-anyos, warang agom asin residente kan Victory Village, Legazpi City.
Nakumpiskar sa suspek an nasa labi 400 gramos nin pigtutubudang shabu asin may kantidad na pocomas o menos P2.6 milyon.
Afuera digdi, nakumpiskar man saiya an cellphone, ginamit na behikulo, asin iba pang dokumentos.
Segun sa opisyal napag-araman na dati nang nadakop an suspek kan taong 2016 alagad liwat ining naarestar ngunyan na taon kun saen nakumpiskar saiya an mga iligal na droga.
Sa presente nasa kustodiya na kan Camalig Municipal Police Station an suspek asin mahahampang sa kasong pagbalgar sa Republic Act 9165 o Comprehensive Dangerous Drugs Act of 2002.
