LEGAZPI CITY—Karsel an bagsak kan sarong lalaki pigkokonsiderar na High Value Individual sa kinundusir na buy-bust operation kan mga kapulisan sa Barangay Putiao sa banwaan kan Pilar, provincia kan Sorsogon.
Segun ki Pilar MPS Duty Investigator Police Master Sergeant Angelo Ariola, sa intrevista kan Bombo Radyo Legazpi, binisto an suspetsado na sarong 33-anyos, residente kan Barangay Dao kan nasambitang banwaan.
Nakumpiskar digdi an pinagtutubudang shabu na may gabat na 10 gramos asin may kantidad na pocomas o menos na P68,000.
An suspetsado mahahampang sa kasong pagbalgar sa Acta Republika 9165 o Comprehensive Dangerous Drugs Act of 2002 asin nasa kustodiya na ini kan Pilar MPS para sa magkakanigong disposisyon.
Mientrastanto, sinabi ni Ariola na dae nagpupundo an mga kapulisan sa pagpuho nin mga ilegal na droga para man na magin matoninong an namamawaang Pilipino.
