LEGAZPI CITY- Nag-urogma suboot an mga durugista puon kan mapundo an mga operasyon kan Philippine National Police (PNP) kontra sa iligal na droga makalihis na maimbwelto an nagkapirang tauhan kaini sa paggadan sa negosyanteng Koreano na si Jee Ick Joo.
Ini an pahayag kan hepe kan Legazpi PNP na si PSUPT Nilo Berdin kun sain inapod pa kaining manloloko an nagkapira sa mga drug surrenderers na nagbaralik sa iligal na aktibidad.
Sigon sa hepe, nahiling ninda an tunay na ugali kan mga ini kan paramientras sindang mawara sa war on drugs.
Sa ngunyan, igwa nin abiso an hepe sa mga drug personalities sa syudad na makipag-kooperar sa lakdang kan gobyerno huli ta kun dae, igwa ini nin mabubugtakan huli na man sa pagbalgar sa ley.
Dugang pa ni Berdin, dae dapat na tugutan na magdakol pa an mga imbwelto sa ipigbabawal na bulong huli ta nakakaraot an mga ini sa ibang tawo.
Tinawan duon man kan opisyal na pigigibo man sana kan pulisya an saindang trabaho bilang taga-implementar kan ley.
Katakod kan pangapodan nin kooperasyon sa mga imbwelto sa droga, positibong sinabi kan hepe na igwa pa nin tsansa an mga ini na magbago kun tatabangan an saindang mga sadiri.
