LEGAZPI CITY — Nagpa-abot nin pakikidumamay an pamayo kan Legazpi City Police Station sa nabayaang pamilya kan nagadan na si Mark “Mak-mak” Obogne.
Kun babalikan, nadiskubre an hawak kaini sa Brgy. Pintor, Polangui, Albay na may mga tama nin bala asin nakagapos pa an mga kamot sa packaging tape.
Sa ekslusibong intrevista kan Bombo Radyo Legazpi ki P/Supt. Eymard Gomez, inasegurar kaini na nag-iimbestigar naman an mga personahes tangarig na maaraman an totoong istorya kan pagkagadan ni Obogne.
Isinairarom naman sa ballistic examination asin nasa restrictive custody kan hepatura an napangaranan na si “PO3 Biñas” na ipig-iimbwelto ni Ralph Estipona sa blotter report na nakua kan Bombo Radyo team sa Brgy. Pigcale.
Ikinondukta man an paraffin test sa iba pang personahes.
Kinumpirmar man kan hepe an report na ipig-release na si Obogne, Estipona asin saro pang nabistong si Briones makalihis na mapagsirbihan an reglamentary period kan Nobyembre 1, alas-dos nin hapon na suhay sa nakakaag sa blotter kan barangay na dinara pa an mga ini kan nasa anom na pulis lunad kan duwang behikulo asin ipiglibot pa sa kun saen-saen na lugar.
Mientras tanto, ipigbuyagyag man kan opisyal na dati nang may record an tolong dinakop na persona sa kaso nin harabunan sa ciudad asin iba pang pagtaraid na banwaan.
Preparado man si Gomez na ipahiling an footage kan CCTV sa lugar na pigsasabing dakulang katabangan sa mga ipigbabatong alegasyon mientras na nakatalaan man na magsumiter kan sadiring report sa Albay Police Provincial Office na susog sa saindang ipigsasagibong imbestigasyon.
Sa ibong kaini, padagos man giraray an mga ipigkokondusir na police operations kan Legazpi City Police.
