LEGAZPI CITY- Sa haros sarong bulan na pagkawara kan PNP sa war on drugs, nagdakol an mga drug surrenderers na nagbalik sa saindang mga iligal na bisyo.
Ini man an problema ngunyan kan Daraga Municipal Police sa saindang pagbabalik sa kampanya kontra droga sa irarom kan bagong lunsar na Project Double Barrel Reloaded.
Sinabi ni PSUPT Elcid Roldan na dakol sindang nareresibeng sumbong gikan sa mga concerned citizens asin barangay officials na nagbaralik sa iligal na aktibidad an mga dating nagsurindir na drug personalities sa enot na kabtang kan gyera kontra droga kan PNP.
Kun kaya ngunyan, ipighayag ni Roldan na padagos an saindang revisiting sa mga ini ngani na liwat na magpagirumdom asin iberipika an mga naresibeng impormasyon.
Tinawan duon man kaini na saindang sususugon an mga nagpapadagos sa illegal drug activities.
Pangapodan kan hepe sa mga ini na isipon an matanos na buhay kumpara sa easy money asin magbago na para sa kapwa asin sa bilog na nasyun kan Pilipinas.
