LEGAZPI CITY—Wara nang buhay kan makua an sarong hawak kan lalaki sa baybayon kan Brgy. San Juan, Bacon District, Sorsogon City.
Segun ki Sorsogon CDRRMO Technical Assistant Russel Conde, sa intrevista kan Bombo Radyo Legazpi, na segun sa pahayag kan pag-iriba kan biktima na ini nalamos makalihis na pigbalong iligtas an saiyang kaiba na suboot malalamos man kuta; ini tulos man na pigrespondehan kan Sorsogon Provincial Disaster Risk Reduction and Management Office magin kan Philippine Coast Guard.
Dugang kaini na kan Pebrero 24, nakatalaang magkundusir sinda nin Search and Retrieval Operation sa pinangyarihan kan insidente sa Brgy. San Juan, Bacon alagad dae nakayanan kan saindang mga bangka an hukol sa kadagatang parte kan lugar.
Kun kaya napagdesisyunan ninda na sa may pier site kan Brgy. Poblacion, Bacon District magpuon kan paghahanap asin binaybay ninda ini hanggang sa makaabot sa Barangay Santo Domingo kun saen igwa man na mga nakabugtak na personahes kan Philippine Coast Guard asin nakipagkoordinar sainda.
Pigtaram kan opisyal na napagdesisyunan ninda na an operasyon gibuhon sa sunod na aldaw, Pebrero 25.
Alagad kan pasado ala-una nin maagahon kan Pebrero 25 nakaresibi sinda nin apod gikan sa sarong barangay official kan Brgy. San Juan, Bacon kun saen nahiling suboot kan sarong parasira an sarong hawak nin persona sa baybayon kan Purok 1, Brgy. San Juan, Bacon District.
Tulos man ining dinuman kan CDRRMO Bacon Team asin ipinaaram sa pamilya, asin kinumpirmar na ini an saindang nawawarang kapamilya.
Mientrastanto, padagos man an saindang pagiromdom lalo na sa mga parasisira lalo na kun maraot an panahon na dae muna magpasiring sa laot siring man an pagpapagiromdom sa mga residentes na dae magpasiring sa kadagatan kun dae man kinakaipuhan.
