Haros 700,000 na indibidwal o labi sa 200,000 na pamilya an apektado kan Bagyong Basyang sa manlaen-laen na rehiyon kan Visayas asin Mindanao, base sa pinakahuring report kan Department of Social Welfare and Development (DSWD).
Segun sa report kan Disaster Response Operations Monitoring and Information Center (DROMIC), rinibong mga residentes an nagtetenir sa mga evacuation centers makalihis an mahiwasang pagbaha asin landslide na dara kan padagos na makusog na pag-uran.
Sa Northern Mindanao, naglampas pa sa 100-year return period an pag-uran, sarong indikasyon nin sarong pambihira asin matinding weather event na nagin rason kan pag-apaw kan mga salog asin pagbaha sa mga komunidad.
Dose man an nairehistrong binawian nin buhay sa Cagayan de Oro asin Iligan City na kadaklan huli sa landslide asin pagkalamos.
Labing 400 na harong an naraot, mantang ginatos pa an nagsapo nin dikit na danyos.
Pigsierto ni DSWD Secretary Rex Gatchalian na nakaposisyon na an mga relief goods asin asistensya sa mga apektadong lugar antes pa man magtama an bagyo.
Padagos an pagdistribwir nin food packs, hygiene kits, asin iba pang pangangaipo sa mga evacuees.
Apwera sa Visayas asin Mindanao, apektado man an nagkapirang parte kan Bicol Region.
.){kind=link}