LEGAZPI CITY — Ipigbuyagyag kan Philippine Coconut Authority (PCA) Albay na labi nang naapektaran an ekta-ektarya nin niyog sa provincia kasunod kan pag-aalburuto kan bulkang Mayon kan mga nakalihis na semana.
Sa intrevista kan Bombo Radyo Legazpi ki Ed Bailon kan PCA Albay, nasa 36 na barangay sa provincia o kabilugang 2,571 ektarya nin niyugan an apektado kan 3,300 na coconut farmers.
Sa tercer distrito kan Albay partikular na sa banwaan kan Guinobatan asin ciudad kan Ligao, buminadol na sa 1,798 ektarya an apektado o 748 na paraoma.
Nasa 398 paraoma man sa Mi-isi asin Matnog kan Daraga na may 225 ektarya an apektado.
Pitong barangay man sa banwaan kan Camalig an apektado o may coconut area na 895 ektarya o 486 na paraoma.
Magin an nagkapirang lugar sa ciudad kan Tabaco, banwaan kan Malilipot, Bacacay asin Sto. Domingo an apektado man kan aktibidad kan bulkan urog na kan ash fall.
Dugang pa ni Bailon na pwedesir pang magamit an mga niyog alagad dae sierto kun maray pa an kakaluwasan kaini urog na kun dae pa mapundo an aktibidad kan bulkan.
Mientras tanto, nagtao naman an ahensya nin firewood o panggatong sa mga residente kan Guinobatan kun sain an iba sa mga coconut lumber an pwedesir mang gamiton para sa tent o temporary house.
Inasegurar man ni Bailon na en kasong abuton nin tulong bulan an evacuees, makakapagtao pa sinda nin panggatong sa evacuees tangarig na dae na paggamiton pa an mga libro, tukawan asin iba pang gamit sa eskwelahan.
