Ihinalangkaw pa kan Philippine Rice Information System(PRiSM) an hiwas kan mga omahan na posibleng maapektaran kan mga uran na dara kan Tropical Depression Querobin sa Mindanao.
Susog sa pagtaya kan satellite-based rice monitoring system kan nasyun, posibleng maabot sa 19,119 na ektarya kan mga omahan an maaapektaran, ini mas halangkaw kumpara sa inisyal na haros duwang ribong ektarya kan nakaaging aldaw.
Ini pigbubuo nin 925 ektarya kan mga omahan na presenteng nasa vegetative phase asin nasa 5,442 ektarya na presenteng nasa ripening stage.
Na kun saen dakulang porsyento an nasa reproductive phase—ini katumbas kan 12,752 na ektarya nin mga omahan.
Kadaklan kaini gikan sa mga probinsya kan Mindanao, mantang posible man na maapektaran an mga omahan sa rehiyon kan Bicol huli man sa mga pag-uuran.
Susog sa state weather bureau, sa masunod na 24 oras halangkaw an tyansa nin makukusog na pag-uuran sa Bicol region, Eastern Visayas, probinsya kan Agusan del Norte, Agusan del Sur, Davao de Oro, Davao del Sur, asin Davao del Norte, huli sa epekto kan tropical depression asin shear line.
