LEGAZPI CITY- Nahabon an mga importanteng gamit kan sarong empleyado akn National Bureau of Investigation Regional Office 5 sa harong kaini sa 388 Alamares Subdivision, Mabatag, Brgy. Sagpon, Daraga, Albay.
Personal pang nagpasiring sa istasyon kan Legazpi PNP an biktimang si Ely Lobete, 58-anyos na Administrative Aid 6 kan NBI ngani na ireport sa mga otoridad na nilaogan an saiyang harong asin nakua kan mga parahabon an nagkapirang mga gamit.
Sigon sa hepe kan Daraga Municipal Police na si PSUPT Elcid Roldan, kabale sa mga nakua an clutch bag kun sain nakabugtak an sarong unit nin badil na Glock generation 3 na calibre .45 pistol na kargado nin sarong magazine na nagkakantidad nin P40,000.00; NBI Badge; wallet kaini na may kwartang maabot sa P1,940.00; ATM card magin an iba pang identification cards kabale na an NBI ID, protection agent ID, LTO Driver’s License asin PNP Lambat Sibat ID.
Pigtutubudan na maagahon kan maglaog sa nasambitan na harong an mga parahabon sa tahaw kan pagkaturog kan nasambitan na opisyal.
Sa ibong kan sinapar kan biktima, naglalaom ining maibabalik pa saiya an mga nawarang gamit.
