“Harassment?”
Ini an nagin simbag ni Senador Joel Villanueva sa pangapodan ni Ombudsman Jesus Crispin Remulla na ipa-otob an 2016 dismissal order laban saiya kan Ombudsman.
Ipigheras ni Villanueva an mga kopya kan sertipikasyon hale sa Office of the Ombudsman asin Sandiganbayan kun sain an enot an nagpapatunay na wara siyang nakabinbing kasong kriminal o administratibo, asin an ikaduwa an nagpapatunay na bako siya akusado o nasasakdal sa ano mang kaso sa hukuman.
An duwang dokumento an parehong inisyu kan Setyembre 10, 2025.
Segun sa senador, piglalaoman na ninda an siring kaining klase nin panghaha-harass dagdag pa an pagpapalakop kan kadakol na fake news laban saiya.
Kan mahapot man kun ngata siya maghagad kan clearances asin ini suboot an paghahanda man kan saindang pagsusunad nin kaso laban sa mga nagpapalakop kan fake news.
Sa sarong intrevista sinabi ni Remulla na masurat siya kay Senate President Vicente Sotto III nganing ipa-otob an dismissal order kay Villanueva hale sa saiyang posisyon sa gobyerno.
Kan 2016, ipigsugo ni dating Ombudsman Conchita Carpio Morales an pagpapatalsik kay Villanueva sa serbisyo publiko huli sa suboot anomalya sa paggamit kan P10 milyong pondo hale sa saiyang pork barrel allocation kan siya an kongresista pa.
